ओमिक्रॉनच्या धास्तीनं 1 तारखेपासून पुण्यात पुन्हा निर्बंध

पुणे, दि.३०:- पुण्यात १ तारखेपासून पुण्यातील चित्रपट आणि नाट्य गृहात प्रेक्षकांच्या संख्येवर निर्बंध नसतील अशी घोषणा पुण्याचे पालकमंत्री आणि राज्याचे उपमुख्यमंत्री अजित पवार यांनी केली आहे.मात्र त्या घोषणेची अंमलबजावणी होण्यापूर्वीच निर्बंधांनी डोकं वर काढलंय. ओमिक्रॉनच्या पार्श्वभूमीवर पुण्यातील चित्रपट आणि नाट्यगृहात सध्याच्या निर्बंधांनुसार 50 टक्के प्रेक्षकांनाच प्रवेश मिळणार आहे..तर खुल्या जागेतील कार्यक्रमांसाठी 25 टक्के प्रेक्षकांना परवानगी असणार आहे.पुणे महापालिकेचे आयुक्त विक्रम कुमार यांनी हे नवे आदेश सोमवारी काढले आहेत. पालकमंत्री आणि राज्याचे उपमुख्यमंत्री अजित पवार यांनी शनिवारच्या आढावा बैठकीमध्ये मनोरंजन क्षेत्राला दिलासा दिला होता. पण ही बैठक होताच काही वेळातच राज्य शासनाने नवे आदेश जाहीर केले आहेत. कोरोनाचा नवा व्हेरियंट ओमिक्रॉनमुळं संपूर्ण जग धास्तावलं आहे. याच पार्श्वभूमीवर निर्बंध लावण्याचा निर्णय घेण्यात आला आहे. महापालिकेचे आयुक्त विक्रम कुमार यांनी सोमवारी रात्री नव्याने आदेश जारी केले. चित्रपटगृह, नाट्यगृह, मंगल कार्यालय, सभागृह यासह इतर बंदीस्त जागेतील कोणत्याही कार्यक्रमासाठी जागेच्या क्षमतेच्या 50 टक्के उपस्थितीसाठी परवानगी देण्यात आली आहे.